जगण्यावरील संदेश

हे जगण्यातले खरे सौंदर्य..

जगणं किती अवघड आहे, 

डोक्यावरच्या ओझ्यावरूनही कळते आहे आणि तिच्या कुशीत वाढत असलेल्या बाळावरूनही. 

... पण ओझ्याने दबेल ती आई नव्हेच.

जगण्याच्या अवघडलेपणाचा लवलेशही तिच्या 

चेह-यावर नाहीय.

माझ्या मते जगण्यातलं अभिजात सौंदर्य यापेक्षा वेगळ असूच शकत नाही.
====================
" शब्द "
शब्द उभा करता 
आला पाहिजे, 
मनामनात ... गुढीसारखा 

शब्द झेलता
आला पाहिजे, 
शंकराने झेललेल्या ... गंगेसारखा 

शब्द गिळता 
आला पाहिजे, 
निळकंठाने प्राशलेल्या ... विषासारखा 

शब्द पेलता 
आला पाहिजे, 
रामाने पेललेल्या ... धनुष्यासारखा 

शब्द मोजता 
आला पाहिजे, 
उर्मिलेच्या ... क्षणांसारखा 

शब्द पुजता
आला पाहिजे, 
हनुमानाच्या ... भक्तीसारखा 

शब्द चाखता 
आला पाहिजे, 
शबरीने चाखलेल्या ... बोरासारखा 

शब्द जोडता 
आला पाहिजे, 
लंकेच्या ... सेतूसारखा 

शब्द भोगता 
आला पाहिजे, 
अश्वत्थाम्याच्या ... जखमेसारखा 

शब्द मागता 
आला पाहिजे, 
दुर्योधनाच्या ... हट्टासारखा 

शब्द तोलता
आला पाहिजे, 
बळीराजाने ... तोलल्यासारखा 

शब्द कोरता 
आला पाहिजे, 
अजंठाच्या ... मुर्तीसारखा 

शब्द फेकता 
आला पाहिजे, 
पुंडलिकाच्या ... विटेसारखा

शब्द बोलवता 
आला पाहिजे, 
ज्ञानेश्वराच्या ... रेड्यासारखा 

शब्द फडकवता
आला पाहिजे, 
शिवबाच्या भगव्या ... झेंड्यासारखा 

शब्द जपता 
आला पाहिजे, 

वहितल्या ... पिंपळपानासारखा